h1

Seren Taun Bukti Ngamumule Adat Budaya Sunda

26 Maret 2012

Cigugur, IB

Seren Taun di Kelurahan/Kacamatan Cigugur mere bukti yen budaya Sunda masih dimumule. Seren Taun mangrupa upacara sukuran adat masarakat agraris di Tatar Sunda nu diayakeun unggal 22 Rayagung.

Taun ieu diayakeun ping 22 Rayagung 1944 Saka Sunda (18/11/2011) di Gedong Paseban Tri Panca Tunggal Cigugur.

Dina acara, di payuneun panggung kahormatan dipintonkeun seni buhun saperti Angklung Buncis ti Kenekes Banten, Memeron, Goong Renteng turta Ngajayak. Acara sukuran ka Nu Maha Agung ieu diluuhan ku gegeden kayaning Direktur Kementerian Pekerjaan Umum H. Sulasmo, ME, Ketua DPRD Jawa Barat Irfan Suryanegara, anggota DPRD Jabar Irwan sareng H.T. Mamat Robby Suganda, S.Sos.

Lian ti eta, Bupati Kuningan H. Aang Hamid Suganda, S.Sos, Ketua DPRD Kuningan H. Acep Purnama, SH, MH, Dandim 0615 Letkol Kav. Sugeng Waskito Aji, Kapolres Kuningan AKBP Wahyu Bintoro, katut rebuan warga masarakat gegek minuhan sabudereun Gedong Paseban.

H. Sulasmo, ME ngaraos reueus dumeh di jaman kiwari, budaya Sunda masih keneh dimumule kalayan daria nu diluluguan ku Yayasan Tri Panca Tunggal.

Pangeran Jati Kusumah, minangka Pupuhu Yayasan Tri Panca Tunggal ngawilujengkeun ka sadaya nu sarumping kalayan someah. Jati Kusumah nyebutkeun yen nu dongkap lian ti gegeden teh, dongkap oge wawakil ti sawatara pangagem adat kapercayaan sa-nusantara kayaning ti Kalimantan, Banten, Sulawesi, NTT, pupuhu Persatuan Kraton Seluruh Indonesia (PKSI), katut ti Kasultanan Brunei Darussalam.

Anjeunna, dina biantarana netelakeun yen perlu ngamumule adat budaya minangka tali paranti ti karuhun nu tos jadi kawajiban sadayana. Hususna, sikep welas asih kedah ditumuwuhkeun tur dilarapkeun dina kahirupan sapopoe.

Bupati Kuningan, H. Aang Hamid Suganda mepelingan yen dina era globalisasi kiwari, kade ulah tepi ka tigebrus ku budaya deungeun, alatan poho kana budaya sorangan. “Kukituna budaya lokal kudu terus dimumule jeung larapkeun dina kahirupan sapopoe,” saurna.

Pemda ngaku tur ngajenan pisan kana budaya asli Kuningan anu masih dimumule saperti Seren Taun, Kawin Cai, Sintren jeung sajabana.

Ngamumule tur mertahankeun budaya di unggal wewengkon di nusantara, saur pupuhu PKSI, estu tanggung jawab sadayaan. Jalaran, kiwari mah, karaton teh teu gaduh kakawasaan politik. Hal ita dipalar sangkan bisa mertahankeun kasajarahan, budaya nu masih keneh aya.

Numutkeun anjeunna, di nusantara kungsi aya sawatara karajaan nu jaya, tapi ayeuna mah leungit, dalah kurutna oge duka di mana, saperti Karajaan Sriwijaya jeung Majapahit anu kawentar sa-nusantara. Hal ieu beda pisan jeung di Nagara Cina anu tepi kawangkid ayeuna masih keneh bisa ngamumule dinasti nu pernah aya, saperti Dinasti Ming jeung sajabana.

Kukituna Pamarentah Pusat sareng Pamarentah Daerah dipiharep leuwih mere pangajen ka karaton nu aya diwewengkonna saperti bantuan waragad dipalar, kasajarahan, seni tur kabudayaan bisa lana.

H.T. Mamat Robby, nalika ditalek ku IB ngeunaan kagiatan Seren Taun netelekeun yen anjeunna dongkap minangka ngajenan sangkan budaya Sunda ulah leungit. “Kuring ngajenan kana budaya Sunda saperti sabilulungan, sanes ngeunaan kapercayaanna,” saur Robby. (tan)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

%d blogger menyukai ini: